المراقبة امينة ضيفة كرسي الاعتراف..

تذكير بمساهمة فاتح الموضوع :

[center]


مرحبا فيكم
اعضاء منتدانا الغالي مازالت رحلتنا مستمره في كرسي الاعتراف
وها هو اللقاء يتجدد مع ضيف جديد
ضيف يحمل الكثير من معاني التميز والابداع
ضيفتنا هي المراقبة ( أمـــــونــــــهـ )

أهلاً وسهلاً بـك في " كرسي الإعتراف "

غمرتينا بلطفك وتلبيتكِ الدعوه بكل رحابة صدر فسلمتِ على تجاوبك

نتمنى ان يكون اللقاء ممتعاً ومميزاُ ..

في انتظار اسئلتكم واستجوابتكم



واقدم لها باقة ورد اتمني ان تعجبها ...



و اتفضلي..على بالي السخانة بزاااف





نترككم أعزائي لترحبوا بالضيفه ..

كما يرجى العلم ان للضيفه حرية عدم الإجابة عن أي سؤال يعتبر شخصي ...

مدة الإستضافة هي اسبوعين...


ولي عودة مع باقة من الأسئلة ..


بداية بطافتك الشخصيه ...


تحياتي للضيفه وللجميع ...

آلاء يا آلاء ، كنت نستنى فيك تشاركي معانا والحمد لله

شكرا جزيلا راكي درتي اكثر من الواجب ، وشكرا على باقة الورد عجبتني بزاف



ماهي التجربه التي تتمنين تكرارها ...؟؟ نرجع نعاود نعيش الطفولة

من هو توأم روحك ...؟؟ للأسف معنديش

احلى خبر سمعتيه كان له أثر بالغ في نفسكِ...؟؟ مرة جات اما فرحانة ، حرت واش صرا أول مرة نشوفها في قمة السعادة، قاتلي اللي قتل باباك مات اليوم، "هو كان ارهابي كبير"، وبطبيعةالحال فرحت على خاطر حياة ناس بزاف كانت في خطر وديما يهدد فيهم" مات وراح الشر معاه وربي يرحم اللي قتلهم

شخص لاترفضين له طلبا ..؟؟ ههههه ، مكانش .. حسب الطلب وامكانيتي ، بصح منبخلش اللي نقدر عليه نديرو مع اي واحد

ما الذي تكرهينه في نفسك؟؟ احيانا العزلة

موقف ندمتِ انك فعلتيه؟؟ راني جاوبت عليه الفوق

متى تحبين أن تكوني وحدك ؟ كي نكون حزينة ، منحب حتى واحد يشوفني بالحالة هذيك

عندما تكونين وحدك ما هو الشي الذي تفكرين به ( شي شاغل تفكيرك ): كنت عايشة حياتي عادي ، معندي حتى مشاكل / من نهار عرفت واحد الانسان حياتي كامل رجعت تفكير معلاباليش نعمة ولا نقمة

ما هى اجمل هديه استلمتيها؟ مرة فالصيف رحنا نحوسو قصدنا العاصمة وشفنا بزاف ولايات "نهار وليل" برا والله يامات يهبلو ، هديتي تاع الباك

ماذا تعني لك الدموع ,, الحنان

امنيه تتمنين انها تتحقق لكِ ..؟؟ نكمل نقرا دكتوراه فالخارج


كم ساعة تجلسين على النت يوميا ؟؟؟ كل مرة كيفاه ، إذا معنديش شغل نطول ، وساعات مندخلش خلاص


ماذا يعنون لكِ اعضاء المنتدى؟؟ باختصار إخوتي وأهلي وأصدقائي

ههههه انصاف حبيتكم تعيشو معايا شوية ههه

ومرحبا بيك وبالدفعة تاعك

1- امينة واش كان رد فعلك لما قتلك هدي انت (صورتك) شفيتي ههه ؟ ههه شفيت ، والله قريب حبس قلبي من الخلعة ههه ، قلت صح لعود انا بقيت نشوف فالتصاور.

2-هل انت معي في هذا : الانسان الكتوم يسمع لناس كامل ويحب يشوف الناس كامل فرحانة وهو ما يحب يحكي والوا واش يصرالوا وان اراد يختار شخص وااااحد فقط؟؟؟؟؟؟ معاك 100% ، وتقدري تقولي انا هي الإنسان هذا

3- من قبل قلتي انا ضد المراة العاملة لماذا في رأيك؟ قلت المرأة المتزوجة العاملة (اللي ماش متزوجة عادي) ، بصح المرأة المتزوجة وتخدم مستحيل توفق بين خدمتها ودارها ... لازم تكون تسمح في وحدة منهم ، وراح تجي فالدار متلتاش بروحها ، تهمل دارها وراجلها والكارثة إذا عندها اولاد وكي يكونو المشاكل يبداو يشكيو .
المرأة اعطاها ربي اعظم مهنة كي تكون في بيت زوجها راهي تغسل تطبخ تسهر على ولادها بزااااف حوايج ، وكيما رانا نشوفو الناس راهي حالة محلات و100 خدام باه تحل مطعم مثلا ، ولا محل للغسيل ولا أي حاجة ، بصح المرأة في دارها دير لحوايج هذو كامل امالا تلتى بدارها وتنحي الخدمة من راسها (طبعا هذي لللي حابة تكسب جنتها ، لأنو زوجها هو جنتها ولا نارها)

4-انت صادقة دائما مع نفسك؟ ساعات نكذب على روحي.

5- متى قلتي خلاص لصبر حدود ؟ احكينا الموقف ؟ مفهمتش السؤال هذا ، وضحيهولي من فضلك

6-صداقة حقيقية عشتيها كم كانت مدتها ؟ وهل مزالت مستمرة؟ أكيد انا وصحباتي عندنا اكثر من 8 سنين (نموت عليهم صح)

7-مذا تختار امينة بصراحة الجمال الداحلي او الخارجي او كلهما بنفس المقدار؟ الخارجي ميهمنيش ، نفضل الداخلي
لأنو الخارجي ميدومش يروح وقادر في لمحة بصر يتبخر، بصح الداخلي يبقى فالباطن مستحيل يروح

8-في اجابتك السابقة قلتي انا لا اتمن بصداقة الرجل والمراة وحين طرح عليك سؤال الاعضاء قلتي فؤاد اروع صديق رايته بحياتي ؟؟؟ على ما اظن هذه ايضا صداقة اولا لا؟؟ ههههه didi فؤاد نعرفو غير فالشات ونعتبرها صداقة ، نهدر فالواقع نعرف ذكور يقراو معايا بصح صداقتنا في مجال ، ماش كيما خرين حكايات البورتابل ديما مع بعض .....الخ، فرق كبير بين واحد تعرفيه من وراء جهاز تبعي غير واش يكتب ، وانسان عايش معاك فالواقع ديما تشوفيه قدام عينيك



وما السلبيات في رايك في صداقة المراة والرجل ؟ الصداقة ممكن تتحول لحب من طرف واحد

9- انت مع الام التي تصاحب اولادها ام زوجها ولماذا؟
لازم تصاحبهم في 2 ، باه تكسب حبهم في زوج ديما.

10- انسان عندما عرفتيه تغيرت حياتك : عرفت واحد غيرلي حياتي
من هو: باه ميقتلكش فضولك ههه : يقرا معايا. département وحدة
وكيف تغيرت ؟ مع الأول كانت أحسن ومن بعد حالتي رجعت أسوأ منها مكانش.

11- متى اخر مرة ضربتك امك هههه وماذا فعلتي ؟ ههه كي قريت السؤال ضحكت، انصاف مشفيتش إذا كان ضربتني اما فحياتي ، ولاأي واحد من عايلتي

12- اغمضي عيناك وقلي ماذا تذكرتي ؟ ضرك راني نتخيل ، عندي خويا حاب يتزوج والمرة هذي راح لبلاد لقبايل ، قالنا باه تروحو نهار السبت تخطبوها والله راني عييت نتخيلها كيفاه مدايرة هههه. (عندي فضول الله غالب)

شكرا، العفو انصاف

- متى قلتي خلاص لصبر حدود ؟ احكينا الموقف ؟

قصدي موقف او حكاية طلبت منك ان تصبري صبرتي صبرتي وصلتي لحد معندكش طاقة لصبر فهمتني ؟


وتجي دفعات اخرى

لكن وينهم الاعضاء ؟؟؟؟؟؟؟؟؟؟

rana hna insaf
ah samholi 3endi problem f clavier marahch yaktab en arabe
mais ki nsalho rayha narja3
psk les questios maktobin b larabe yjiw khir hhhh
ghi matkhammich gadafi jamé yansahab lool

ههه لقد عدت نقدملك بعض الأسئلة نتمنى تعجبك أمونة


- ما هى نقطه ضعفك؟

- ماهو مفتاح شخصيتك؟

- متى تشعـــرين بالخطـــــر ؟

- ما هو الموقف الذى اضحكك وابكاك فى نفس الموقف!؟

-هل اعجبت بعضو بالمنتدي من طريقه اسلوبه ؟؟

- من يبتسم كثيراً يخفي جبل من الاحزان " ماهو رايك بهذه العبارة..؟

- يقال أن المظهر .. لمعان في الخارج .. وإنهيار في الداخل

هل تؤمن بذلك .. ؟

- هل غير النت بحياتك الى الاحسن او الى الاسوء .. ؟

- نقطة من بحر الحزن تغرق بحراً من السعاد :

( صح أم خطأ هذا العبارهـ من وجة نظرك ) ؟

- لو بيدك تسعد اربع اشخاص في كل هذا الكون مين هما ..؟

- احلى صدفه صارت لك مع اي احد .! ومتى .؟

- هذا البيت لمن تهديهـ ..
( لو تمطر الدنيا نسيان صدقني ماأنساك
وكل قطره من مطرها تجبرني بذكراك )

مع التحـــية

هاااااااااااااااااني جييييييييييت أمونة واش راكي حبيبتي ان شاء الله ما تكونيش تعبتي من كرسي الاعتراف
على العموم هاهي ذي اسئلتي
* كيف لأمينة أن تتصرف أمام خيانة أحد صديقاتها ؟ (واذا كان عندك موقف حكيهونا لو سمحتي)
* هل من السهل ان يكتسب الناس ثقتك ؟ وإلى أي حد يمكنك وضع الثقة بأحدهم؟
*هل تؤمنين بالحب عبر الانترنت ؟لمذا؟
* هل أمينة مزاجية
*من هم الاعضاء لي تفتقديهم بالمنتدى وشكون منهم لي عندك بالمسنجر
اعترفي
اممممم انظن بزاف عليك وييااكك ؟؟؟ ههه في انتظار اجاباتك

didi كتب:

- متى قلتي خلاص لصبر حدود ؟ احكينا الموقف ؟

قصدي موقف او حكاية طلبت منك ان تصبري صبرتي صبرتي وصلتي لحد معندكش طاقة لصبر فهمتني ؟

؟؟؟؟؟؟؟؟؟؟

راني فهمتك ، مركزتش كي قريت هذا ماكان


مرة صراتلي (مشكل عائلي) ،معليش نحكيلكم عليه
عندي خويا متزوج وعندو مشاكل بزاف مع مرتو ، هي كي ميكونش مليح معاها ترجع على اما (فوق الشي ساكنة وحدها ف 1 etage) تجي وتبدا دير فالمشاكل، واحد نهار صبرت عليها وخرجت ليها قلتلها هدرة قستها فالصميم، حكمها chok مني على خاطر كنت نحترمها وجامي صرات حاجة بيناتنا ، و تستاهل psq الواحد اللي ميحشمش هكذا مليحتلو باه يعرف روحو.

مرحبا بيك ساره


- ما هى نقطه ضعفك؟ حاليا كاين اسم كي يتذكر قدامي نفشل صح ، وصحباتي يستغلو الموقف

- ماهو مفتاح شخصيتك؟ يقولولي نحكي بحكمة (كي شغل عندي 40 سنة).

- متى تشعـــرين بالخطـر ؟ بصراحة كي تغيب اما على الدار.

- ما هو الموقف الذى اضحكك وابكاك فى نفس الموقف!؟ كي ظهرت نتيجة الباك

-هل اعجبت بعضو بالمنتدي من طريقه اسلوبه ؟؟ نعم،

- من يبتسم كثيراً يخفي جبل من الاحزان " ماهو رايك بهذه العبارة..؟ صحيحة ، بصح أحيانا برك

- يقال أن المظهر .. لمعان في الخارج .. وإنهيار في الداخل

هل تؤمن بذلك .. ؟ منامنش بيها بزاف، حنا نقولو "زين من برا واش حالك من الداخل " ، كل واحد كيفاه كاين اللي يلمع من الخارج والداخل ، و كاين اللي من الخارج والعكس ، انا منحكمش على الإنسان من المظهر ، حتى نعرفو مليح باه نحكم عليه.

- هل غير النت بحياتك الى الاحسن او الى الاسوء .. ؟ والله للأحسن تعلمت بزاف حوايج ، أحسن حاجة كي عرفت أشخاص كيفكم والمنتدى هذا ديما نحكي عليه لعايلتي كاملة وصحباتي ،

- نقطة من بحر الحزن تغرق بحراً من السعادة :

( صح أم خطأ هذا العبارهـ من وجة نظرك ) ؟
خاطئة ، برأيي العكس صحيح "نقطة من بحر السعادة تغرق بحراً من الحزن" ، لازم نشوفو لكل الأمور بمنظار جيد ، باه نقضيو على الحزن

- لو بيدك تسعد اربع اشخاص في كل هذا الكون مين هما ..؟ أمي ، نختار يتيم نتنى نمسحلو دمعتو بيدي ، صحبتي منال ، وانسان عزيز بزاف (مكلاه نذكر اسمو).

- احلى صدفه صارت لك مع اي احد .! احلى صدفة صراتلي ، كي عرفت انسان عطاني طعم آخر للحياة.

ومتى .؟ العام هذا برك .

- هذا البيت لمن تهديهـ ..
( لو تمطر الدنيا نسيان صدقني ماأنساك
وكل قطره من مطرها تجبرني بذكراك )

سارة اطلعي شوي الفوق تلقاي خاطرة كتبتها ، هذاك هو الإنسان اللي نهديهالو

اهلين بيبا ، راني مرتاحة فالكرسي ، بصح كي نكمل نروح l'opticien ندير نواظر ، وليت منشوفش مليح هههه

بيبا لي رجعة للإجابة

و راني نستنى فقوات القذافي

ههه مرسي أمينة على اجابة وحاولي على عينيك مازالنا نحتاجوك

(هل تتفق مع مقولة : ماتسطيع ان تحلم به تستطيع ان تحققه ؟ )
او انها مجرد مقوله في رأيك؟

* (اذا تمنيت اشياء ولم تحصل عليها ماذا تفعل كأن تحب مثلا
ولا تصل لمن تحب او كأن تحلم بالوصول لهدف ولم تصل ؟) ماذا ستقول ؟

2* ( ماذا تقول عن دموع الرجل ؟ )

ما هو الامان في رأيك وماالذي يجعلك تشعر به ؟

و الكلافيي نتاع العربية رجع جماعة القدافي دوك ترجع وجدي روحك امونة ههه

امونة نعطيك دفعة جديدة لكن قصيرة =)

1- او انطباع كي عرفتك يا امينة هو انت انسانة حساسة وقوية في نفس الوقت صح؟ واحياننا 2 صفات هدو من الصعب نلقاوهم في انسان واحد

2-امينة واش رايك في الذكور الي يسمعوا الاغاني الشرقية ويشاهدوا الافلام التركية مثلا ؟(علابالي حرية شخصية ولكن رايك الحقيقي )

3-الشيء المميز في امينة ؟

4-امينة تغني ولا ترقص ولا ههههه او بدا لهبال ؟

ايا من بعد نزيدك ايا بالتوفيق

يا جماعة خرج قلب امينة


شوفوه


[/size]

امووووووووووووتة
منزيدلكش ديدي راها مكفية وموفية
راهي طايحة عليك بالاسئلة قوش دروات هههههههههه
حبة حبة على البنت خرجتيلها قلبها قولتيها بفمك اديدي.........بالراحة شوية على البنت راها غير صابرتلك
اااااااااااو كي تنوضلك منحكيلكش خخخخخخخخخخخخ
جاوبيهم ومن بعد نسقسيك انا تاني نهبلك شوي

هههههههههههههههههههههههههههههه بصح ماحلاه قلب

اااااااه ه لازم يا جماعة ديما يكون خارج

ههههههههههههههههه ، والله عجبني هبالكم

ضرك نكمل معاكم

ي الاء اي محباش تستسلم هباتها ومزال مرفعتليش الراية البييضاء خليها برك ههه حتى تهبل صح اصبري عليا ههه

مع بيبا

* كيف لأمينة أن تتصرف أمام خيانة أحد صديقاتها ؟ أبشع شيء هو الخيانة، المشكل انا منعرفش الانتقام ، بصح عندي طريقتي الخاصة تجيبلي حقي.

(واذا كان عندك موقف حكيهونا لو سمحتي): اوكي.
الخيانة هذي كانت من عند وحدة كنت حاطتها في مقام صحبتي ، وخانت الصداقة هذي بطريقة مستحيل ننساها.. حنا ف 3 بنات نقراو مع بعض والباقي ذكور ، وفالأسبوع الأول تأقلمنا مع بعض وكنا صحبات b1 ، وحدة تسكن قريبة وليا ، ولخرى بعيدة شوي المشكل جا منها هي، وكانت تغير مني فكل حاجة وصحبتي لخرى لاحظت وكانت تنصحني ، انا محطيتش اهمية بقيت معاها بنيتي وشفت اللي جامي تخيلتو منها .
كان طالب يقرا (معنا) ف spécialité وحدة اخرى ، ويجي عندنا ديما يجي يقصدني "انسان هايل تربية واخلاق وقراية ديما يكون مع الماجور" ، والحاجة اللي منفهمهاش يقريني فيها ، وكان ديما يجي يستناني قبل ما ندخل نقرا هي محملتش ، (الكارثة عندها boyfriend وعندهم 4 سنين مع بعض)، وكنت نشوف منو غير الحاجة لمليحة ورتحتلو بزاف حتى رجعت انا نحوس عليه كي ما يجيش ، والشيء اللي يصرا معايا نحكيهولها
مرة كانت مقلقة قاعدةوحدها فالكلاسة رحت ليها قاتلي : علاه انا معنديش الزهر انتي شوفي كيفاه يعاملك وانا تاعي حتى ميحبش يشوف معايا، وانا بكل نبية صافية قعدت معاها حتى رجعتلها الضحكة باه خرجت وهي موجدتلي bombe ، دارتلي مشكل كبير بيني وبين الطالب هذاك ، حبست كل حاجة بيناتنا قبل حتى ما تصرى ، مع الاخر تاع العام عرفت واش دارت قلتلها نوكل عليك ربي ، تخرج فيك نيتي ايامات صرا فيها شيء خلاني نندم علاه قلتلها الكلمات هذوك "باباها طلق امها ، وهي خلاها boyfriend تاعها" عيطتلي تبكي ملقيتش واش راح ندير نحكي معاها ولا نقفل عليها . المهم حطتني فموقف تمنيت لوكان مت ومعشتوش.

* هل من السهل ان يكتسب الناس ثقتك ؟ نعم

وإلى أي حد يمكنك وضع الثقة بأحدهم؟انا منديرش ثقة فالناس كامل (كاين عباد معينين).

*هل تؤمنين بالحب عبر الانترنت ؟ عادي ،

لماذا؟ وسيلة كيما باقي الوسائل باه يتعرفو 2 على بعض.

* هل أمينة مزاجية : بزاااف.*من هم الاعضاء لي تفتقديهم بالمنتدى وشكون منهم لي عندك بالمسنجر
اعترفي : عندي انصاف ، نهاد، رنوش، فؤاد (كان عضو معنا)، سليمة
(وراني حابةيكونو عندي خرين)

نروحو للزعيمة:

(هل تتفق مع مقولة : ماتسطيع ان تحلم به تستطيع ان تحققه ؟ )
او انها مجرد مقوله في رأيك؟ هيه نتفق معاها ، الإنسان كي يحط أحلامو أهداف يقدر يحققها بسهولة، ميبقاش يتمنى ويحلم هكذاك.[/b]

* (اذا تمنيت اشياء ولم تحصل عليها ماذا تفعل كأن تحب مثلا
ولا تصل لمن تحب او كأن تحلم بالوصول لهدف ولم تصل )
ماذا ستقول ؟ [b]منقول والو ، بصح راح نكون حزينة

2* ( ماذا تقول عن دموع الرجل ؟ والله نمووت كي نشوفهم ، نشوف معنى الرجولة فيهم.

ما هو الامان في رأيك: الأمان هو الحماية ، والحضن الدافئ

وماالذي يجعلك تشعر به ؟ كي نكون مع الناس اللي نحبهم.

didi ، قلبي يبان باهي أول مرة نشوفو ههههه




1- او انطباع كي عرفتك يا امينة هو انت انسانة حساسة وقوية في نفس الوقت صح؟ صح يا انصاف
واحياننا 2 صفات هدو من الصعب نلقاوهم في انسان واحد : منيش نشوف فيها صعيبة ممكن لأنو هذي هي طبيعتي.

2-امينة واش رايك في الذكور الي يسمعوا الاغاني الشرقية ويشاهدوا الافلام التركية مثلا ؟ منستغربش ، اللي يسمع اليسا نعرفو بلي حساس ورومانسي ،



3-الشيء المميز في امينة ؟ نسمع للناس كامل ، يعني مشاكلهم ، وهذا الشيء يخليني نقدر نكسب صداقات بزاف

4-امينة تغني ولا ترقص ولا ههههه او بدا لهبال ؟ ههههه شوفي نغني ونرقص ونزغرد والله منبخل فلعراس من اللي ندخل منقعدش ههههه

صابريني يا امينة نزيد نخرجلك قلبك كثر وكثر ولا مانيش انا
راني نـgــلك فات آآآطونسيو , إيل فو ردي بالك

امونة اني جيتك ام تستسلمي قوليلي نحبس


الاسئلة هاد المرة من نوع اخر هههه


تفضلي جميلتي =)




1-إذا كانت الخضار والفاكهة تفيد في تخسيس الوزن ، فلماذا لم يستفد الفيل منها ؟ ههههه


2-أنت تركض للأما م لتخفيض وزنك ، ماذا لو ركضت للوراء هل يزيد وزنك ؟؟

3-لماذا الصمغ الشديدالفعالية لا يلتصق بالأنبوب الذي يحتويه ؟

4-إشارة ممنوع المشي على الحشيش المزروع ، كيف وضعت في مكانها ؟؟

5-البطيخ الذي لايحتوي بذور ، كيف تمت زراعته ؟

6-نسمع كثيراً عن سرعة الضوء ، طيب كم تبلغ سرعة العتمة ؟؟


7-لماذا يعقمون الإبرةالسامة لقتل المحكوم عل يهم بالإعدام ؟؟؟؟

8-لماذا كان الطيارون الانتحاريون اليابانيون ( الكاميكاز ) يرتدون خوذة
واقية ؟؟؟

9-إذا كان السوبر ماركت يفتح لمدة أربعا وعشرين ساعة في اليوم لمدة عامٍ
كامل ، فلماذا وضعت عليه الأبواب والأقفال؟؟



امينة القذافي جن جنونه لازم تجي لقذافي نهاد تعاوني هههه

تيتوز إلى الأمام ، راني نستنى فيك

يا didi المهبولة :هبالك فريد من نوعو هههه

1-إذا كانت الخضار والفاكهة تفيد في تخسيس الوزن ، فلماذا لم يستفد الفيل منها ؟ ههههه ميخممش مسكين ، "بارد القلب يموت سمين". هذا هو السبب ههههه ... الفيل خلقو ربي ضخم بزاف ووزنو يتناسق مع ضخامتو


2-أنت تركض للأمام لتخفيض وزنك ، ماذا لو ركضت للوراء هل يزيد وزنك ؟؟ ههههههههه جامي شفت هبال كيما هذا.... ديدي الركض للأمام ولا الخلف هو الركض كيف كيف ههه أكيد فالحالتين راح تحرقي الدهون

3-لماذا الصمغ الشديدالفعالية لا يلتصق بالأنبوب الذي يحتويه ؟ ههه : لأن الانبوب مصنوع من مادة متلتصقش بالصمغ، ويكون مغلق الهواء ميدخلش ليه .

4-إشارة ممنوع المشي على الحشيش المزروع ، كيف وضعت في مكانها ؟؟ حطوها قبل ما ينبت

5-البطيخ الذي لايحتوي بذور ، كيف تمت زراعته ؟ ههه خايفة لا نعطيك اجابة كيما اللي مديتها للأستاذ تاعي ... مازال مشفتش بطيخ بلا بذور

6-نسمع كثيراً عن سرعة الضوء، طيب كم تبلغ سرعة العتمة ؟؟ العتمة معندهاش سرعة .

7-لماذا يعقمون الإبرةالسامة لقتل المحكوم عل يهم بالإعدام ؟؟؟؟ هذا قانون المهنة

8-لماذا كان الطيارون الانتحاريون اليابانيون ( الكاميكاز ) يرتدون خوذة واقية ؟؟؟ سير للأمن

9-إذا كان السوبر ماركت يفتح لمدة أربعا وعشرين ساعة في اليوم لمدة عامٍ
كامل ، فلماذا وضعت عليه الأبواب والأقفال؟؟ كاين ظروف وين تصرا حاجة طارئة مثلا سرقة ولا فسدت حاجة لازم يقفلو الابواب

والله قريب هبلتيني يا انصاف ، بصح منستسلمش كوني متأكدة هههه

امينة عجبوني بزاف اجاباتك =)


هبالك فريد من نوعو ههه لهبال انواع متشرفين هه


يا جماعة امينة ماش راح تستسبم عاونوني شوي =)


يعطيك الصحة امونة وان شاء الله كانوا خفاف عليك برك