عودة اعضاء منتدى شباب الجزائر من جديد

اولا السلام عليكم جميعا و مرحبا بيكم جميعا
اكيد كل واحد فيكم احساسو غريب و هو راجع يفتح المنتدى و يتصفحو بعد مرور سنوااات و اكيد كل واحد غيكم كان يطل على المنتدى من بعيد مرة على مرة متاكدة انا عن نفسي مكةنتش نطل عليه بانتظام و لكن بين كل فترة و فترة نجي نضرب طلة
اليوم قررت باش نرجع للمنتدى و ندمت اللي هجرتو مكانش لازم نفرط فيه لانو قد ما تعبت فيه قد ما كانت عدي ايام جميلة هنا و كونت صداقات من وراء الشاشة فقط مع ناس رائعين و مازالت مستمرة الحمد لله
توحشتتكككككم كلكم ليكم وحشة كبيرة و جامي نسيتكم
مهما الهتنا مشاغل الحياة نتمنى ترجعو طلوا علينا في هاد المنتدى لو مزال عندو خاطر ليكم
نحبكم جميعا و نتمنى تفجروا الموضوع بتعليقاتكم كما بكري ههههههههه

و عليكم السلام و رحمة الله وبركاته رنووووشة
ايه و الله ليهم وحشة كبيرة كل الاعضاء و خاصة كي تقرأ المواضيع و الردود تاعنا و خصوصا العفو ية و الضحك .. اشتقنا لكل شيء و لأنفسنا خصوصا في داك الفترة، الإنسان صح يتبدل و لكن انا كدلك والله كل مرة تتفقد المواضيع و كنت نسيت كلمة المرور لولاك لما قدرت ندخل الحمدلله نتمنى نشوفو باقي الاعضاء ينوروونا و يخبرنا كيفاش راهم نتمنى يكون كامل بخير وصحة وسعادة...

السلام عليكم نتمنى تكونوا بخير نهاد و رانية وكل الاعضاء والله كيما قلت توجور كنت نتفكر المنتدى و نتفكر المشاركات ديالنا و الاعضاء فوتنا ايام جميلة فيه في كل سطر كاينة قصة و اليوم كي دخلت حكمني البكاء ايام لا تنسى كانت من افضل المراحل فحياتي في هذا المنتدى اللي كان منزل لينا في يوم من الايام

عدنا والعود أحمد .. دخلت بعد جهد جيد هههههه

هذا كان بيتي لوكان مانطلش يوميا نحس حاجة ناقصة للأسف هجرناه والسبب التطبيقات الحديثة facebook .. Instagram وغيرها ... حاجة اخرى من نهار WIFI شخصيا استغنيت على pc عدت مانستعملوش غير الموبايل (تقريبا كامل هكذا)

بصح ديما راكم فالبال والقلب الأعضاء.. المواضيع .. توحشتكم كامل وتوحشت مواضيعنا الهادفة و كيفاه كنا نتنافشو

نتمنى نعاودو نرجعو هذوك ليامات ... نتمنى كل الأعضاء يكونو بخير يا رب

Ahlin w shlin b amouna w sarouu7a namarto lmontada
Wlh frht li jito
Ntmana tkono b saha w hnyin f hytkom

Sarytaghz كتب:

السلام عليكم نتمنى تكونوا بخير نهاد و رانية وكل الاعضاء والله كيما قلت توجور كنت نتفكر المنتدى و نتفكر المشاركات ديالنا و الاعضاء فوتنا ايام جميلة فيه في كل سطر كاينة قصة و اليوم كي دخلت حكمني البكاء ايام لا تنسى كانت من افضل المراحل فحياتي في هذا المنتدى اللي كان منزل لينا في يوم من الايام

مرحبا بيك سرسورة واش اخبارك الدكتورة تاعنا ان شاء الله بخير ماماك لاباس؟ نورتي المنتدى بوجودك و فرحت كمزال متفكراتو ⚘

ان شاء الله يرجع كيما قبل و خير

نحتاجو معجزة ترجع الأعضاء

المنتدى بلا بيا ,,,,,,,,قاع مشي منتدى بكل تواضع ,,أحم احم ,,,,بصح راها كاينة وحدة راها مغيبتهالي ,,,,,,Sarytaghz ,,,,,مازال ماقبضتها وقيلة كبرت ...ومرانيش نحصي ,,,,,المهم مرحبا بكم كامل والعشاء عندي اليوم

amina كتب:

ان شاء الله يرجع كيما قبل و خير  

نحتاجو  معجزة ترجع الأعضاء

hhhhhhh sa7 wellah

هههههه مختار صحبتي و جارتي صراح لكن نسات كلمة المرور هدا جديد

Sarah راني متفكراتك ان شاء الله راكي لباس الحمد لله على السلامة ههه

مختار هذا أنت صح عرضتنا للعشا الحمد لله عشت وشفت ههههههه ماكنتش خلاص متخيلة .. بصح علابالي واش راه جاي

هههههه هادي العشا منتبهتلاش يا أمينة انا ههه واه الخير راه كاين هادا الترحيب اللي قبل العاصفة ههههه باش يوجدنا مليح ههه و لا حاب يسممنا بلاك يتهنا مننا ضربة وحدة ههههه

ههههههه,,,,,عيب عليكم زعمة من كثرة الفرحة انتاعي بيكم ,,,,بغيت نضيفكم ونكرمكم ونعشيكم ,,,,نستاهل ,,,باغي نسممكم ,,,,شحال هذا وانا نقارع هذي اللحظة ومنين جات ,,,,,باغيين تحرموها عليا ,,,,,ااواه نتموما زوج من بعد نتلهى بيكم ,,,,,رانيا صراح مرحبا بيكم تنتوما زوج ,,,وبس ,,,صحاب النية الزينة ,,,,sarah.....صارة ولا صراح ,,,,نهاد شرحيلي الاسم ,,,,,اليوم نفوتلكم قاع واش قلتوا ,,,ؤاكم مسامحين ,,,المهم مرحبا بكم
هاهو عشاكم ,,,,,,,

هههههههه
و تبرادي هادا بنادم و لا انا راني نتخبل حرام عليك في هاد الليالي ههههه مقديتش تا نتمعن في الصورة ههههه خوفتني
اسمها صراح نعيطولها سارة جينا خفيف و لكن صراح هو الحقيقي..
سما انا و امينة ماشي مرحبا بينا

اقري التالي ,,,,,,,قلتلكم عندكم ثلاث ايام غادي نفوتلكم قاع واش تقولوا ,,,,,,مرحبا بيكم ,,,,وانت شتي غير الراس ,,,,زعمة قلت نشويلكم خروف ,,,رجع يخوف ,,,,,انت وامينة ماراكم انتاع ميعاد ,,,,,عرضتكم قولتولي باغي يسممنا ,,,,,ذبحتلكم الخروف وشويته قلتوا هذا بنادم وراه يخوف ,,,نستاهل ,,,,,,,,,,,,تاكلو بيتزا ,,,,,,,,,

ههههههههههههه و الله ضحكت من قلبي
ايا صايي ناكلو تاا حنا بصح انت تبدا هههه 🤪🤪🤪

خليتي ناكل صاي راني فقدت الشهية كوليه وحدك ,,,,,شاهوا ابدي بالراس ,,,,

واش من عشاء بقا دروك تبالي هبلتو انا راني ريجيم بصح كليت شوية طعام بلبن و نهاد اكره حاجة عندها الراس تاع الخروف ههههه

واش انت تاني دخلتي في الخط مع اختك ولينا مهابيل ,,,,,وريجيم ,,,,,علاه انا راني كل نعرضكم ,,,غير اليوم درت جاست على اقل ,,,انتوما ديرو جاست ,,,والله ماتحشموااااااا
امينة ,,,,,,,,باغي يسممنا
نهاد ,,,,,,,,,راه يخوف تحسب راس بنادم
رانيا,,,,,,,,,,راكم مهابيل راني دايرة ريجيم
ياو انا المهبول لعرضتكم ,,,,,,زعمة راكم عاد جايين وفرحانيين لكان جيتوا زعفانيين مرانيش عارف واش ديروا فيا ,,,,,,

هههههههه اودي يكتر خيرك ناكلو ناكلو صايي هانا اجينا
‍�‍�‍�‍�‍�‍�‍�‍�

هههههههههههه الحمد لله ماشفتش عشاك البارح فالليل والله تبان جثة فرعون مكسلة ههههههههههههه ....  نهاااااد  عجبتني وتبرادي الكلمة هذي تقتلني بالضحك


مختار ماديرلناش المشاكل وكتاه قلت تسممنا ما صدقت ديرلنا عشا .. اللي قصدتو اليوم تعشينا وغدوة تعلن الحرب علينا كي عوايدك

(الصورة بالبورتابل تخلع صح صح بصح بالميكرو تبان عادي )  المهم كثر خيرك على العشا مخلوف عندنا ان شاء الله هههههههه

ههههههههههههه اوه و الله تشبيه في محلو امينة ههههه انا راني بالبورتابل و شفتها في الليل مقديتش تا نتمعن فوتها بالخف ههههههه الرعب و في الاخير ظهر خروف مشوي ضلمناه

اخخخخ امينة قتلتيني و الله شفتي زعما راه يمهدنا هادي صرالها كما العروسة كي يجيبوها اول اسبوع يقلشوها و منبعد يكشروا على انيابهم

راكم بديتوا الحرب ,,,,,صاي مكان لا ثلاث ايام لا يومين ,,,,,,من نهار لول راكم متفاهمين عليا ,,,,,املا وجدو ارواحكم ,,,,,