العضو مختار على كرسي الاعتراف..

معليش نريح فيه شوية ......بصح كاينة حاجة ...غادى نتفاهموا عليهاااااااااااااااااا....انتما غاديين تسقسوا وانا نجاوب ....بصح تحملوا نتيجة الأ سئلة نتاعكم .....مشى كواحد ميعجبهش الجواب يزعف ..........اياااااااااا ......لعنده الكوراج يسقسى

هههه مرحبا بيك في كرسي الاعتراف ديما تخلعنا بكاش حاجة سبيسيال...

المهم انت نورت الكرسي...و استنى الاسئلة نتاعي..

جماااعة بلا منوصيكم قرقجوه بالاسئلة..

مرحباااااااااااااا بيك مختار ما لا غير وجد روحك

مرحبا بك في كرسي الاعتراف خطوة عزيزة هادي امالا غير تسنانا رانا راجعين بواحد الاسئلة شابين ياسي مختار

نورت الكرسي اخي

مرحبا بيك مختار على كرسي الاعتراف
و اكيد ادا جاوبت قد السؤااال و علاش نزعفووو؟؟!

في الاول اسئلة عن الاعضاء...
و ارجو ان تجاوب باسم الاعضو فقط
عضو توقيعه روعه..( )


عضو نشيط... ( )


عضو مفقود... ( )


عضو تفرح بوجوده .. ( )


عضو تحسه واثق من نفسه ... ( )


عضو داخل مزاجك ... ( )


عضو يغيضك .. ( )


عضو تتمنى تلقتي به ... ( )


عضو مثقف... ( )


عضو ودك تغير اسمه ... ( )


عضو ودك تعرف معنى اسمه ... ( )


عضــو تحس أن فيه خــمول (كسل ) ... ( )


عضــو يجذبـك بأسلوبه وطريقـة ردوده ... ( )


عضـو أحيانا ينرفزك بـ ردوده ...( )


عضو ودك تقول له صح لسانك .. ( )


عضو أتحس انه طموح ... ( )



عضــو يناسبه لـقب المحبوب ... ( )



عضو تقوله (( الله يسامحك )) .

كي تجااوب على هادو نزيدك اسئلة اخرى ان شاء الله
شكراااا

عضو توقيعه روعه..( )......هدا سؤال ...................توقيعى ولما عجبهش يخبط راسه فى الحيط
ضو نشيط... ( ) ....الاء....بس مواضيعها .......فلسفية اكثر منها واقعية ....بمعنى حابسة
ععضو مفقود... ( )...........امينة و ديدى
عضو تفرح بوجوده .. ( ).........اي واحد المهم ماتيكونش انت ......
عضو تحسه واثق من نفسه ... ( )......مختار ..............................

عضو داخل مزاجك ... ( ).....................نينااااااااااااااااااااااااااا
عضو يغيضك .. ( ).....................نهاد
عضو تتمنى تلقتي به ...................................قاع
عضو مثقف... ( )..................مختار
عضو ودك تغير اسمه ... ( )..................الزعيمة
عضو ودك تعرف معنى اسمه ... ( )...................مكانش
عضــو تحس أن فيه خــمول (كسل ) ... ( )................بيباااااااااااااااااا كسولة ومشحاحة ...
عضــو يجذبـك بأسلوبه وطريقـة ردوده ... ( ..................نينااااااااااا والزعيمة
عضـو أحيانا ينرفزك بـ ردوده ...( )..........نهاد .......كنكون انا وياك ...نخبرك علاه
ضو ودك تقول له صح لسانك .. ( ).........مكا نش لشتله لسانه......بصح نقول ...الاء
عضو أتحس انه طموح ... ( ).....يوسف قسنطينة
عضــو يناسبه لـقب المحبوب ... ( ).........يوسف الرومانسى
عضو تقوله (( الله يسامحك )) ........الله يسامحناااااااااا قاع .........
زيدي .......هدا ماعندك ............................

بسم الله نبداو ..نبدالك بشوي اسئلة ومن بعد نكمل بارتي بارتي.........
جاوب على حساب السؤال ماتتفلسفش بزاف ....ههههههه.
1 .من هو مختار عرفنا بك.....
2.ماذا تفعل في حياتك .تدرس او تعمل ....او ماذا ....
3.ماهو هدفك في الحياة ..وماهي امنياتك التي حققتها والتي لم تحققها بعد.....
4.ماهو اكثر شيء يعجبك في منتدى شباب الجزائر كمنتدى........
5.وماهو الذي ودك تغييره في المنتدى......
6.كم عمرك....جاوب سون تفلسيف .....
7.لوكان يقولك واحد انت حابس واش تقوله...هههههه نتمسخر برك.......
8.اسوء حدث صرالك في حياتك......
9.اجمل حاجة او حدث صرالك فرحاتك بزاف....واش هي......
10.ماهي الحكمة او المثل اللي تقتدي به في الحياة .........

وللحديث بقية لي رجعة باسئلة اخرى .......يالحابس.

.من هو مختار عرفنا بك............يليقلى مجلدات ....المهم بكل بساطة إنسان عادى بسيط
ماذا تفعل في حياتك .تدرس او تعمل ....او ماذا ........متحصل على ليسانس إ لكترونيك ....بصح تاجر والدبلوم رانى مخبيه ....إدا تستحقيه نعطيهلك باطل ......
.ماهو هدفك في الحياة ..وماهي امنياتك التي حققتها والتي لم تحققها بعد........ماعندى حتى هدف كنمركى نخبرك .......وعمرى ماحلمت ومادرت أمنية فى خاطرى باش إدا ماتحققتش ....مايغيضنيش الحال ...
بصح يمكن ان تعتبريه أكبر الخطأ .....
ماهو اكثر شيء يعجبك في منتدى شباب الجزائر كمنتدى..........الأ عضاء ......فقط
وماهو الذي ودك تغييره في المنتدى......لم اعد استفيد من مواضيعه ....يا ألاء ...مجرد معلومات عن الصدق والوفاء والحب و....و.....لاتوجد معلومات قيمة ومفيدة ...اتمنى ان تتغير المواضيع
كم عمرك....جاوب سون تفلسيف .......33 سنة .....
لوكان يقولك واحد انت حابس واش تقوله...هههههه نتمسخر برك.....الله يسلمك
اسوء حدث صرالك في حياتك......نهار لى عرفتك فيه ...................................هههههههههه
.اجمل حاجة او حدث صرالك فرحاتك بزاف....واش هي......كى يبشرونى بالجنة
.ماهي الحكمة او المثل اللي تقتدي به في الحياة .........الرجوع للحق خير من التمادى فى الباطل

زيدي يالحابسة ...............هدا ماعندك ......على فكرة وضعتى توقيع رائع ....احسنت ال ختيار وأرشحه ليكون اجمل توقيع .....بصح مشى انت لخيرتيه....شمون خيرهلك

السلام عليمكم
مرحبا بيك يا مختار في كرسي الاعتراف كي رحت انا تبدل كلش


المهم اسئلة بزاف في راسي


نبداو بشوية



1-اجمل اوقات حياتك؟


2-اذكر 5اشخاص اللي ماتقدرش تستغنى عنهم غير كي يموتول ؟؟


3-في الدنيا واش تفضل العلم ولا المال صراحتا؟؟؟؟

4-انت كرجل او شب هل مع حرية المراة الي نعيشوها درك ولا ضد ولماذا ؟؟؟

5- هل اعتذرت لشخص من قبل ولماذا ؟؟؟؟

6-انت مع او ضد صداقة بين الرجل والمرأة؟

7-كتاه حسيت بالفشل وكفاه قدرت تقاوموا ؟؟؟

نتمنى يعجبوك الاسئلة

-اجمل اوقات حياتك؟.........والله ياديدى انا نعيش النهار لرانى فيه ....ونحاول نعيش فيه احلى الأوقات ...........................
-اذكر 5اشخاص اللي ماتقدرش تستغنى عنهم غير كي يموتول ؟؟.....والله ياديدى أنا إنسان ميخليش ليسوفونير موراه .......والدنيااااا علمتنى باش حتى حية .....مانعزهااااا لدرجة انى لا أستطيع
الأ ستغناء عنه ......ولهدا حب الأشخاص معنتهاااا حب شئ ستفقده يومااااااااااااا .....فلا داعى لأن تجعله فى مكان يصعب الأستغناء عنه ....وانت تعرف انك ستفقده يوماااااا....ا ..هده هي الدنياااااااااا
في الدنيا واش تفضل العلم ولا المال صراحتا؟؟؟؟........الدنياااااااا بلا مال ماراهى دنياااا....والدنيا بلا علم ماراهى دنياااااااااااااا........وربى علمنا واحد الدعاء...فى قرانه الكريم ....ربنا اتنا فى الدنيا حسنة وفى الأخرة حسنة وقنا عداب النار ..............الحسنة انتاع الدنيا هي المال والحسنة نتاع الأخرة هي العلم ..............
انت كرجل او شب هل مع حرية المراة الي نعيشوها درك ولا ضد ولماذا ؟؟؟..........انا رانى مع الحرية لى قالهااااا ربى ورسول ........إدا كانت حرية المراة مع لى قالها ربى رانى معاهاااا.....وإداكانت ضد حرية إلى قالها ربى انا ضدهاااا ...........
هل اعتذرت لشخص من قبل ولماذا ؟؟؟؟........اعتدر كل اليوم ....سواء كنت مخطئ فهدا إعتدار فى محله أو كنت على الصواب ....لأنى أكلم أحمق وغبى ومتكبر .....فأنا أعتدر لأننى تحدثت معاه
انت مع او ضد صداقة بين الرجل والمرأة؟....نحط هده الصداقة على ميزان الأسلام فإن كانت توافقه فأنا معهااااااااااااا وإن كانت ضد فأنا ضدهاااااااا.......إن كانت لهدف التوعية والتعلم من خلال المنتديات بدون ان نعرف ماهية الأشخاص فأنا معهااااا وإن كانت لمجرد الضحك والكلام المعسول وكلام الحب فانا ضدهاااااااااااااا ......
كتاه حسيت بالفشل وكفاه قدرت تقاوموا ؟؟؟...............مازلت حاس نفسى فاشلااااااااااااااا فانا لم احقق أي شئ لنفسى فى حياتى .....ولكنى حققت أشياء لناس أخرين ......ولكنى لست نادم ولا ألوم نفسى بل بالعكس أعيش حياة رائعة وبسيطة وجميلة .....هل تعرفين لمادااااااااااا....لأننى لا أنظر إلى مايكسبه الناس ....لأنى أعرف ان مهما ما ملك الأنسان فسيترك كل شئ وسيدهب بأيدي فارغة ......الدنيااااا ليست مكان للعيش والتملك ...الدنيااااا فقط محطة لحياة أخرى فلما أبنى واتعب نفسى خاصة إن كان المصدر حرام فى أشياء .....لكان غير يكون المصدر حلال بعد يكون له صدقة وأجر ...نعطيك مثال .....واحد فى سفينة تغرق وهو يجمع فى المال والمجوهرات .........الله يرحمبوك كتشوفيه .......املا كما هاك الحياة .....الحياة سفينة تغرق ........فلا داعى لنجمع أشياء لا نتفيدنااااا فى شئ عند الله .......
أتمنى ان تعجبك الأجوبة ..............شكرااااا على الأسئلة كانت جميلة وهادفة ......

أيااااااااااااا كاش اسئلة واحداخرين ........ايا شكون يقول .......شكون

راني رجعت في الجزء الثاني ...خخخخ مسلسل يوميات مختار ...عنوان الحلقة... اسال ولا تحتار مع مختار
1.واش هي هواياتك
2.اكلتك المفضلة
3.واش تحب دير في وقت فراغك
4.قولينا موقف محرج صرالك تتفكر مليح.......حبيت نضحك عليك شوي
5.صفة تكرهها في شخصيتك
6.صفة تتميز بها عن غيرك
7.كيف تصف شخصيتك(هادىء...لا اضن.....عصبي..ممكن....رومانسي ...اواه مكانش منها...ههههه راني جاوبت في بلاصتك ) بصح تنجم تجاوب
8.مالذي يفرحك ..وما يغيضك
9.لوكان نقولك وصفلي مختار في 4 كلمات واش تقول.
10.هل انت مع او ضد عمل المراة
11.هل انت مع او ضد المساواة بين الرجل والمراة في كل شيء
12.هل امتلكك الياس في يوم من الايام لدرجة انك تمنيت الموت .....ايوا هالاسئلة كدايرين هههه
13.اهتماماتك علمية او ادبية ( شعر قصص روايات خواطر)
14.واش هو اصعب موقف تحطيت فيه
15قرار مهم في حياتك اتخدته وندمت عليه
16.كي تكون زعفان تحب تهدر وتفرغ واش في قلبك ولا متحبش تحكي وتبقى وحدك
17.هل انت عصامي
18.ماهي الولايات اللي زرتها في الجزائر
19.كي نقولك الوالدين واش تقول....
20.كي نقولك الديانة المسيحية والمسيحيين بصفة عامة واش تقول.....
شوف راني نوعتلك في الاسئلة باش متكرهش .......يالحابس يخصك شي حاجة راني لهيه خخخخخخخ فهمت
انت جاوب ومن بعد نتفاهمو ولا منتفاهموش كي بغيت خخخخ

السلام عليكم واش راكم
اول سؤال هو
1-ما هو رقم حسابك في البنك
2-شكون هو العضو لي تحس انو يفهمك
3-شكون هو العضو لي تحسبلو ألف حساب قبل ما تهدر معاه أو ترد عليه (سواء في حوار مباشر أو موضوع)
4- لما تلاحق الأعضاء الجدد وتحاول مضايقتهم ؟
5-اوصف هاذ الأعضاء بكلمة وحدة
-رانيا
-نهاد
-أمينة
-مينكس
-حنان
-يوسف قسنطينة
-يوسف
-زوليخة ههههه
6-عضو عندك معاه موقف /جيد أو سيئ/ قولنا شكون هو واذا حبيت قولنا اسم العضو
7- عضو كانت عندك عليه فكرة معينة ومع الوقت اكتشفت العكس
8-العضو لي تحب تعرف جديد مواضيعو
سلاااااااااام

.واش هي هواياتك ............مكانش حاجة بالتحديد ....بصح تنجمى تقولى مخرب
اكلتك المفضلة................المشوى
واش تحب دير في وقت فراغك.......نتفرج لفيلم
قولينا موقف محرج صرالك تتفكر مليح.......حبيت نضحك عليك شوي................هههههههههههههههههههه
قولنا........مشى قولينااااااا ........قادرى روحك ....كنتفكر نخبرك .......
5.صفة تكرهها في شخصيتك....................احقر نفسى ......
صفة تتميز بها عن غيرك..........اعرف مايجول فى نفس صاحبى
كيف تصف شخصيتك......متقلبة متغيرة
8.مالذي يفرحك ..وما يغيضك......ا فرح عندما افرح غيري ......واغضب عندما يلمسون كرامتى وعزتى ....

لوكان نقولك وصفلي مختار في 4 كلمات واش تقول......إنسان لا يؤتمن تصرفاته و كلامه
.هل انت مع او ضد عمل المراة........ضد
هل انت مع او ضد المساواة بين الرجل والمراة في كل شيء...........ضد ....من الحمق المساواة بينهما
هل امتلكك الياس في يوم من الايام لدرجة انك تمنيت الموت.....اتمنى الموت كل اليوم ليس لدرجة الياس ولكن لأنى كرهت الدنيااااا والعيش فيهااااااااااااااااا .....لأنها لا تصلح للعيش خاصة فى زماننا هدا لم تعد مكان يستحق العيش
اهتماماتك علمية او ادبية.............علمية أكثر منها أدبية
.واش هو اصعب موقف تحطيت فيه..............................مرانيش عارف
قرار مهم في حياتك اتخدته وندمت عليه........شوفى الندم عملة الشيطان ...لا أحب هده الكلمة ...ماحصل حصل .....وماحصل كان مقدر.......فلما الندم .........
.كي تكون زعفان تحب تهدر وتفرغ واش في قلبك ولا متحبش تحكي وتبقى وحدك .....كنزعف نسكت ومانكلم حتى حد
هل انت عصامي................شوية
ماهي الولايات اللي زرتها في الجزائر ........ولايات الغرب
كي نقولك الوالدين واش تقول............الله يرحمهم
.كي نقولك الديانة المسيحية والمسيحيين بصفة عامة واش تقول.....الله يدخلهم الأسلام


شوف راني نوعتلك في الاسئلة باش متكرهش .......يالحابس يخصك شي حاجة راني لهيه خخخخخخخ فهمت
انت جاوب ومن بعد نتفاهمو ولا منتفاهموش كي بغيت خخخخ.........
كنت جايبتهاااااا غاية حتى شكيتى بلى بريتى من مرضك إلى هو الحبوس ......بصح فى ألأ خير حطمتى قاع لبنيتيه ورجعتى لعادتك .......مرضك راه قابض فيك غايو واش نقولك مرضك مزمن ومكانش دواه .................الله يشفيك يالحابسة

نرجع للحابسة الزاوجة ..........لراهى تتكبر علينااااا وتدخل للمنتدى غير بالقدر ...وقت ليعجبهااااا ولينا الشرف كى كتبتى فيه ...............والردود أنتاوعهااااااااا....أهيه لمن يطيروا
نولى لكاستيون نتاوعهااااااااااااااااااااااااااااااااااااااااااا............
ما هو رقم حسابك في البنك...........ccp......ولا بانك
شكون هو العضو لي تحس انو يفهمك...................انت ولا الزعيمة
شكون هو العضو لي تحسبلو ألف حساب قبل ما تهدر معاه أو ترد عليه...............مكانش بكل إحترام لجميع ألأعضاء ...............
لما تلاحق الأعضاء الجدد وتحاول مضايقتهم ........للخروج عن المألوف والأبتعاد عن كلمات التهانى والترحيب .....................
رانيا.............الأضواء
نهاد.........................المحامية
أمينة..............الحزن
مينكس.......................ماحكيتش معاهاااااااا مليح .........بصح نقول ..مرانيش عارف
حنان.....دخلت مرة وكتبت وقيلة مرة ....بصح هدى صحبة رانياااااااااااااا......غير كيفها
يوسف قسنطينة............شباب بدون خبرة
يوسف.............شباب صاحب خبرة ......ولكن يطغى عليه الجانب الرومانسى ....
زوليخة ههههه .........الفنيانة ..................الكسولة
عضو عندك معاه موقف /جيد أو سيئ/ قولنا شكون هو واذا حبيت قولنا اسم العضو.....
مواقف عادية مع جميع ألأعضاء
عضو كانت عندك عليه فكرة معينة ومع الوقت اكتشفت العكس......
انت كنت حاسبك صاحبة موهبة وكلمات والشعر بصح ما شتنا والو منك ....الكسل فقط
العضو لي تحب تعرف جديد مواضيعو.......يمكن نقول أمينة......مواضعها مرات تكون جديدة ....بصح لخرين والو سيرتوا مين يحكوا على البالون ......ألاء مواضعهاااااا كثيرة بصح تقريبااااا مطلع عليهاااااا منلقاش فيها فايدة وتقريباااا متشابهة .......الصدق الوفاء . من هدا النوع ....................وانت ساجية غير .....الزواجات الا عبين ....زوجة فلان.....

واش صاي هدوهما لكاستيون نتاوعك ......هدا مكان ...................كسولة مشحاحة ..

*مختار لوكان نقولك بلي دائما تجرحني بكلامك ولكن ما نحبش نقول ..... واش هو ردك ؟
*هههه يعني كامل مديتلهم كلمة كلمة وانا 2 مشحاحة وكسولة صااااااااحا
*هل كان خبر زواجك صحيح أم إشاعة للفت الانتباه
*هل تعتقد أن من حولك يعتبرونك مغرور ؟ لمادا؟ وما هو ردك عليهم
*استاد لحد الآن لا تزال تتدكره بالخير *نتاع أي مادة وأي سنة وعلاش هو بالدات* وما تقوليش ماني عاقل حتى علا واحد ولا كاين بزااف اذكرلي واحد يمكن تعزو
*ما هي الرجولة برأيك وما هي الأنوثة
*اذكرلي بعض الصفات لي تتمنى تكون في شريكة حياتك
*هل أنت مع أو ضد البروتوكولات في مجتمعنا

مختار لوكان نقولك بلي دائما تجرحني بكلامك ولكن ما نحبش نقول ..... واش هو ردك..
والله يابيبااااااااااااا....الصدق يجرح والحب يجرح والحقيقة تجرح .....لما ييجرجوش هما النفاق والكدب والمجاملة ......لما ماكونتش نبغيك ونبغيلك الخير كنت نقولك واش راكى حابة تسمعى وتأكدى عندى منه الكثير ولكنى لا أستعمله ..............والله كلامى لا أقصد منه ان اهين أي أحد منكم ولكنه كلام صدق ينبع من قلب صادق هدفه تحفيزكم ....و أسمحيلى على كل كلمة صدرت منى أساءت لك .....خاصة أنت فلك معزة خاصة فى قلبى ............
هل كان خبر زواجك صحيح أم إشاعة للفت الانتباه .............إشاعة فقط لمجرد التغيير ....وإ عطاء نفس للمنتدى لأنى أرى أن نشاطه قل كثيراااااااااااااااااااااااااااااااااا
هل تعتقد أن من حولك يعتبرونك مغرور ؟ لمادا؟ وما هو ردك عليهم.......أجل....يعتبروننى مغرورااا ومتسلط برأيه وغير لهو ليعرف واش راه حاسب روحه ........ردى عليهم ...انهم يقبلون أرائى فى أنفسهم ويرفضونه بكلامهم .....لأنهم لا يحبون الأنهزام والظهور بموضع الضعف
و هده من طبيعة الأنسان ......عامل السن له دور كبير يابيباااااااااااااااااااااااااااااااااااا ....
ستاد لحد الآن لا تزال تتدكره بالخير *نتاع أي مادة وأي سنة وعلاش هو بالدات.....والله غير كاين بزاف بصح غادى ندكرلك واحدة أنتاع اللغة العربية ....... تعرفى علاه ...كانت تنبش فيااااااا باش تدخل معى فو مناوشات ونقاشات ...ومن بعد كى تحمينى ...وتشوفنى كثرت معاهااا الهدرة تبدأ تضحك علياااااااااااااااااااااااااا.................بصح كاين واحد الحادثة صرالت لى فى الجامعة ....شوفى كنا نقرو البيداغوجى فى الجامعة ....وهي مادة نكرههااااا والمعامل أنتاعهااا قليل ...معندهاش أهمية كبيرة ....كنت نشارك ونتفيهم فيهاااا بزاف مع الأستادة ولا فى المشاركات واحد النهار كى جات 12 وجينا خارجين ....قالت لى مسح السبورة ....قلتلهااا....لالالالالااا
قالت لى لالالالا....قلتلهااااااا واه ......وخرجنااااااا
من داك نهار حبست المشاركة ....ندخل ونخرج برك ....أكمل العام ....والموديل نتاعهاااا ما بلعتهش .....ودخلت الدياس .....كانت خاصتنى 10 عندها ونبلع العام .....
ايااااا معليش روحت الجامعة فى وقت الدياس ...لقيتها دايرتنا الأمتحان فى داك النهار فى العشية ...روحت عندها وبديت ريكلامى باش على الأقل ديرهنا غدوة ...كنا فى الساحة نتمشى معاها ونهدر حتى خرجنا فى جارديينى يقطع فى وحد الورد ....حتى قالت لى جيبلى وردة ....
واه انتما النساء واعريين .........المهم حبست وقعدت واقف ....ونخمم واش ندير ....نجيب ولالا ......حتى قالت لى ماتجيبش ......قلت لهااا هدا مكان نجيبلك روحت جبتلها وردة ومزدتش هدرت معاهاااااا .....المهم أخرتنااااا الأمتحان وفوتهااااا وأعطاتنى 14 وبلعت العام ....واش رايك

ما هي الرجولة برأيك وما هي الأنوثة.......الرجولة العزة بالنفس ....ولازم تكون عنده الكلمة ...
الأنوثة ....ان تحيا كأنثى وان تبتعد عن تقليد الرجل وان تعيش على فطرتها بدون تكلف ....
لازم نعرفو شئ ....لا يمكن أبدااااا أبداااااا أبدااااااا...ان نساوى بين الرجل والمرأة ....هما عنصرين مكملين لبعضهمااااااااااااااا....وليس عنصرين منافسين لبعضهماااا .....المراة جزء لا يتجزا من الرجل والمرأة كدلك .....المرأة شعلة توقض فى الرجل كل مسببات النجاح والطموح والتطور ......المراة مصنع الرجال .....ومصنع الأخلاق .....ومصنع التربية ....إدا صلحت صلح المجتمع وإدا فسدت فسد المجتمع ............
ذكرلي بعض الصفات لي تتمنى تكون في شريكة حياتك........اريد إمرأة وفقط تعتز بكونهااا إمرأة همها الوحيد تربية أولادها تربية إسلامية أخلاقية .....
هل أنت مع أو ضد البروتوكولات في مجتمعنا.........أكرههم ولا أحبهم ومتمرد عليهم ....ولا اراعى أي احد فيهم ......و أعمل ما أراه مناسب لى ويساعدنى ....فى إطار ....الأسلام......

المهم اتمنى ان تكونى إ ستمتعتى بإ جاباتى .......هل من مزيد .......هيااااااااااا

راني جيتك

واش راك مختار ، ان شاء الله biennn القعدة هنا تبان مليحة


قولي واش رايك فالحب ؟؟ ، حبيت من قبل ولا لا ؟؟

واش رايك فالوحدة ؟؟

لوكان توصفلنا حياتك في سطر ... واش تقول ؟؟



merçi قبل كل شيء

شكرا جزيلا اخي مختار عجبتني اجاباتك كثيرا انتظر المزيد

أخي مختار أنا قصدت سؤالي الأول حتى يفهم كل الأعضاء طريقة تفكيرك أنا عليا راك تعرفني
وأكيد استمتعت ياجاباتك دمت سالما

راني جيتك.............مرحبا بيك أمينة متشرفين ....وكنت انتضر أسئلتك بشغف
واش راك مختار .................رانى خير منك .............
قولي واش رايك فالحب ؟؟ ، حبيت من قبل ولا لا ؟؟.....الحب شئ فطرى فى الأنسان .....إدا كنت قصد الحب إلى هو بين الرجل والمرأة ......غادى نجاوبك على السؤال الثانى ومن بعد نرجع للأول ...
نعم حبيت بالمعنى المتداول بين الشباب اليوم .......المهم الفتاة تزوجت وانا كملت حياتى ....وهدا صرى كيكنت حابس وغبي .....شوفى باش نجاوبك بكل الصراحة وبكل موضوعية .....الحب المتداول بين شباب اليوم هو حب جنسى ....يحبان بعضهما فقط لممارسة الشعائر والطقوس المتعلقة بالجنس ......عندما ارى بنت 16 وولد فى سنهاا او اكبر منها بقليل يتبادلان كلمات الحب فهل سيكتفيان بالكلمات فقط .........مستحيل ................
الحب نار لا تنطفئ إلا بلقاء المحبوب ......هل يكتفى المدمن على المخدرات بالنضر إلى المخدر ....لكي يريح أعصابه .........محال ...كدالك الحب .......يطلب الوصال واللقاء لكي يهدأ صاحبه .....
ولهدا الحب ممنوع على الرجل اللدى مازال يدرس أو يقرأ أومازال عاطل عن العمل بمعنى مازال بعيد عن فكرة الزواج ........فالحب فريب جدااااااا من الزواج
وكدالك فتاة ممنوع عليها أن تحب وفكرة زواج بعيدة عنهااااا ....أو ان تحب زميل لهاااا فى الدراسة لأنه سيستمر لسنين ...أو أن تحب شخص فقط لا لشئ إلا للمتعة والأفتخار به
لا يوجد حب صادق قبل الزواج .....الحب لا يكون إلا فى الزواج ....هنا يكون الحب مطلوب ومرغوب .....................
واش رايك فالوحدة ؟؟.............ليست حميدة وعادة سيئة ولا خير فيهااااااااااااااا ......من أراد ان يهلك نفسه فعليه بالوحدة ............لأننى مارستهاااااااااااا بدرجة رهيبة .....فوجدت نفسى بعيد عن المجتمع فكريااااااااااااا و حزينااااااااااا كل الوقت بلا سبب ......وجدت نفسى لا أحسن اي شئ فى حياتى .....كنت ارى الناس فى الأعراس او الجنازات يقومون بتنضيمهااااااااااااااا وبضيوفهااااا وأنا حال فمى نتفرج فيهم ....فكرهت نفسى وغيرت من طباعى وعدت سيد التنظيم والأستقبال والتخطيط حتى عدت المشاور رقم واحد فى هده الأمور ........فهل كنت أحسن فى الماضى أو فى وقت الحاضر .............طبعااااا الوقت الحاظر .............
وكان توصفلنا حياتك في سطر ... واش تقول ؟؟..........................
حياتى كانت متنوعة بين الفقر والغنى وبين الجوع والشبع وبين اللبس والعرى ...جمعت كل هده المتناقضات وأخرجت شخصيتى ...............

بصح بغيت نفهم ........هده العبارة ...........merçi قبل كل شيء.....علاه كتبتهااا كما هاك

لو كان كتبتهاااا كما هاك كانت تكون اجمل..........شكراااا قبل كل شئ ...............

شكرااااا لك انت ومرحبااااا بك فى جلستناااا وسعيد جداااااااا بأ سئلتك وانتظر المزيد منهاااااااا

السلام عليكم واش حوالك يا مختار مع الكرسي

هذا السؤال مجهتوا لشخص قبلك وحابت نزيد نعرف موقفك انت بصح اعدني تجاوب بصراحة وصدق وعلى حساب طريقة تفكيرك انت اوكي

رايحا نحطك في موقف وقولي واش دير وعلاه التعليل


لو مثلا انت عندك امتحان ونقولوا هد الامتحان مصيري كون ديروا تحقق واش حاب وتوصل الامنية تاعك وفي نفس الوقت تسمع بأن شخص من العائلة وعزيز عليك بزاف قد توفي (بعيد الشر طبعا )
واش يكون موقفك بكل صدق
دير الامتحان ولا تروح الجنازة


ارجوا الاجابة بصراحة وانتظر رجوعي

والله ياديد سؤال هدا مايستحقكش مجهود كبير فى الأ جابة .......ندير الأمتحان ومن بعد نروح للجنازة ........سيرتو انا القلب ميت ......ولفات فات ولمات الله يرحمه

يعني انا قلت تخير يا الجنازة يا الامتان وانت اخترت الامتحان شكرا على اجابة ولاسئلة اخرى

يعطيك الصحة مختار ، راك جاوبتني بصدق وهذا حسب تجاربك

شكرااا،


راني رجعتلك بسؤال ....!!


علاه قلت فإجابتك السابقة " أمينة ... الحزن"


واش اللي خلاك تحكم عليا بالصفة هذي