عيد الكبير ,,,,

كاش تحضيرات لعيد الكبير ولا راكم ضاربينها بطالو ,,,,,,,,الحس انتاعكم راه مكانش ,,,مالكم ,,,وين راها الاجواء ,,

صراحة العيد كل سامط نتاع الصح ماكان حتى أجواء
الحزن في الوجوه باللي شرا بلي مشراش لا اعلم السبب
و لكن الفرحة راحت و حتى لوكان تبتسم الفرحة متكونش من القلب و الله لا اعلم مرات نقول بلاك كي كبرنا و مكانش أطفال في البيت لانو الفرحة غالبا يديروها الأطفال و يفرحو بالكبش... الخ
مرات نقول ربما نسينا الفرحة من كتر ما قسات الحياة علينا و الله لا ادري الأسباب و لكن طعم العيد اليوم و قبل نقدر نقلك غي الفترة السابقة نتاع المنتدى ايام 2009 2010 كانت احلى ربما كنا عاد ملمومين في منزل واحد لا أدرى، لكن رغم كل شيء نقولو الحمدلله المهم الصحة و الستر
عيد مبارك للجميع كل عام و انت بالف خير يا احلى اصدقاء

كل يوم يمرااا علينا يثبت لنا ان الفرحة هي ليست في المناسبة كالعيد مثلااا او في الشئ كالكبش مثلااا ولكن الفرحة هي في الجماعة واللمة ,,,هرمون السعادة هي الجماعة والعائلة بدونهما لن تكون هناك طعم للسعادة ,,,,,ولهذا الحياة بدون اسرة ليست حياة والوحدة اكبر عدو للانسان ,,,,ماذا اقول ,,كل عام وانتم بالف بخير

صح مختار ، اسفة ربما جوابي فكرك في أشياء ، بصح للأسف صح واش قلت الوحدة قاتلة .. الله يفرج على كل واحد و ربي يعطيك واش راك متمني و يفرحك في حياتك و مستقبلك
انا حطيت فوضى من الأفكار الداخلية نتاعي و انت مديتلي باختصار الجواب عن تساؤلاتي ....

على الرغم من ذلك فعليك التكيف مع الواقع والبحث عن اشياء تسعدك في الدنيا ان لم تسمح لك الظروف في تكوين الاسرة طبعااا تختلف السعادة من شئ لشئ ولكن المحاولة في حد ذاتها مغامرة تنسيك بعض من الروتين اليومي ,,,وعلى الانسان الا يخلص سعادته كلها فس شئ واحد حتى لا تتحطم حياته عند فقدان ذلك الشئ ,,,,مرة اخرى كل عام وانتم بالف خير

صح ما قلته مختار نصيحة في وقتها ... تكوين اسرة لا مفر منه و لكن صعب جدا عندما تتغير حياتك فجأة التعود على دلك صعب و لكن كيما قلت لازم نتكيفو مع الواقع الحمدلله على كل حال
شكرا ليك مختار و عيد مبارك سعيد للجميع

الأجواء للأسف من العام اللي فات ماكانش .. الكوفيد ماخلاش فالعباد من بكري نقصت صلة الرحم وضرك تقريبا انعدمت .
الموت راهي بكثرة (الله يرحمهم كامل) بزاف اللي فقدو الغوالي

"ذلِكَ وَمَن يُعَظِّم شَعائِرَ اللَّهِ فَإِنَّها مِن تَقوَى القُلوب"

مهما كان إظهار الفرحه في العيد عباده وهذي شعائر الله لازم نقدسوها ونعظموها .. ان شاء الله يتقبل منا ربي ويرفع علينا هذا الوباء ويرجع المغترب والغائب وترجع حياتنا كيما كانت ،، وكل عام وانتم بألف خير يااا رب

امينة واش كان هو دورك في العيد ,,,,,الدوارة ,,,,,البوزلوف,,,,,,الغسيل ,,,,,,ولا غير التفراج ,,,,,,انت تاني نهاد ,,,,,,

التفراج !!!  هههههه مصطلح ماكانش ف قاموسي نتمناه
لوكان غير جات في هذوك الثلاثة بوزلوف و دوارة ولغسيل ،، هذو حوايج مفروغ منهم ،، الناس تذبح تكمل تبدا تعيد تلبس تعدل .. انا الميناج اللي نديرو  لوكان يشهد عليا نهار الاخرة يفوتني للجنة دار كامل تتعاود تتسيق بالرغاوي .. خاوتي لازم يذبحو عندنا كامل ولا ماترضاش عليهم أما .. ودار كبيرة ولولاد صغار ما شاء الله كامل يجريو ويلعبو   ما بقات زاوية فيها نظيفة    ...باختصار   البارح رقدت حسبوني مت

يا ختي الغلطة في امك ,,,,,الي عنده دار يقبضها ,,,,يعيدو في ديارهم ويجيبوا لامهم حقها,,,,,كما هاك تربحوا الكبش انتاعكم وتربحو الحقوق انتاعهم وتقعد الدار نقية ,,,,,,الساجيات راهم يقيسوا البوزلوف والدوارة ,,,الذبيحة في الباتوار ,,,واللحم يتقطع عند البوشي وهما غير يشواا وياكلوا ,,,,وانتوما تبغو ديرو كل شئ في الدار ,,,,,املا تستاهلي ,,,,,

مختار بنة العيد في داك الشيء هههه ادا ندار كل شيء برا الدار هي تزيد تكمل فيراه العيد ؟
المهم الصحة و الله يعطيك الصحة امونة
اما انا درت الدوارة بوزلوف و سيقت و غسلت الماعن و دوشت و كملت و كملت ههههه و مباشرة السرير ينادي ضهري موليتش نحس بيه ههههه الحمدلله المهم كيما قلت الصحة و الهنا كدلك
مختار محكيتلناش انت كيفاش جوزت النهار

هههههه مختار المهم الوالدين يرضاو هذا ماكان مرة فالعام معليش .

كيما قالت نهاد بنة العيد كي يكون كل شيء مخدوم فالدار .. هذوك الساجيات عطاتهالهم الدنيا خواتاتك الدمير يمشيلهم فالدم

ههههههههههههههه,,,,,والله غير ذاك الدمير فيه بنة ماتنساش مالقري التعب والشقاء بصح هذيك هي البنة ,,,,المهم بعد الصلاة الله غالب مانعرفش نذبح بصح السليخ راني هنا يجي جارنا يذبح ويروح والباقي عليا نسلخه تقلع الهيدورة ,,نقلع الدوارة ,,,ونقلع قاع الحية الي تنقلع ويبقى غير اللحم معلق ,,,,نعاون الحاجة في التسياق والنقاوة ,,الحمد الله كاين الحوش ,,الي ماعندهش الحوش الله يحسن عونه ,,,,نقلعوا شوية كبدة وشوية الرئة نديروهم في المقلة باش نديروهم سندويش ناكلوهم,,,,نقطعوا بيه التعب ,,,والباقي نديروه ملفوف ,,,تعرفوا الملفوف ,,,نهاد نضن تعرفه بصح امينة بلاك ماتعرفهمش ,,,تعرفيه امينة ,,,المهم دوري ينتهي هنا ويبدا مع الملفوف كي نكمل معاه يكون الفطور واجد والي هو الدوارة احنا نديروها طجين بالحمص ,,,,بعد الفطور التقطاع انتاع اللحم ,,,والمهمة انتهت ,,,,,,

هيه مختار نعرفو نديروه بصح ماهوش عادة "لازم يكون يوم العيد"عندنا فالشرق قلبل اللي يديرو .
ايا سيدي كل شيء خرج على راسك كاش ما خليت

المهم الله يتقبل منا ومنكم ويجعله في ميزان الحسانات ,,,,,,,وكل عام وانتم بالف خير ,,,,,نسييت واش هي الحاجة الي تعجبك في كبش العيد والي تبغيها بزاف .,,,نهاد انت تاني معنية بالسؤال ,,,,,الاء راها غايبة علينا المهم الله يشافي لها يماها ويخليهالها ويبعد عليهم الضر

آمين يارب ان شاء الله تفرحنا بخبر مليح عاجلا

الحاجة اللي تعجبني نحب المشوي ويكون ب لاصوص مايكونش وحدو . شوف نقولك حاجة عليا اللحم بصفة عامة اذا طيبتو أنا ماناكلوش غير نذوق نڨهم منو ومن ريحتو .. بصح اذا جاني واجد تقول أسد لقى الفريسة ههههههههه ،،، طول حياتي حارمة روحي من بوزلوف نكرهو غير من خدمتو و ريحتو ،، حتى مرة غير العام هذا جاني طايب على الجمر والله اكتشفت بلي بنين .

ايا بصحتك المهم راه كاينة حاجة الي تعجبك فيه ,,,,,,تاكله بالهناء والشفاء وبالصحة والعافية ,,,,وا لواحد دايمااا كي ياكل ينوي فيها الشفاء والصحة ,,,في صحة الجميع وادام الله عليكم نعمه وفضله ,,,,

اولا عيدكم مبارك سعيد رغم انو متاخرة بصح معليش نورمالمو توالفتو بيا دايما روتار هههههه صحا عيدك مختار دايما تلمنا بمناسبة و غير مناسبة ربي يفرحك
بالنسبة للاجواء رغم انو الغربة و مكان لا حبيب لا قريب الا انو كما قالت امينة لازم نصنعوا الفرحة لنفسنا و نعظموا شعائر الله رغم انو راجلي كان خدام اول عيد و الكبش وصلنا حتى لثاني عيد بصح درت تكبيرات العيد و لبست لبس جديد ووجدنا المجمر و درنا شواء و ملفوف و بعدها دخلت في غيبوبة العيد و الحمد لله على كل حال
كورونا جات خلطت كل الحسابات انا كنت كل عيد نعيد فدزاير و نعيش الاجواء و نديرو كلش انا و نيناتي مع بعض انا نتشوط مع بوزلوف و هي دير الدوارة هههههه معليش ان شاء الله الاعياد القادمة نعوضوها بالدوبل
و كل عام و انتو بخير يا رب

الله يسلمك ويخليك ومرحبا بيك في اي وقت الدار دارك ,,,,,والكورونا هذي ولت مولات الدار راها كل مرة تروح وتجي باسم واحد اخر ,,,,,وقيلة غاديين نقعدو معاها غير كما هاك ,,,,,الله يلطف بينا ,,,,وانت ربي يكون معاك ويصبرك على البعد والغربة وكل شئ سامط كي يكون الواحد بعيد على اهله وفاميلته ونهاد راها تخلص قاع الغش الي كانت دايرته معاك راه يخرج فيها ,,,حبة حبة ,,,راها عندك وحد الدعوة مقبولة ,,,,,قالك الام كي تزوج بنتها تبدا تبكي راكي عارفة علاه ,,,,,خسرت فام دو ميناج باطل ,,,,,ايوا الله يكون في عونك والله يفرج علينا ويبعد علينا هذا الوباء ,,,,قولينا درتي الفاكسان ولا مازال ,,,وواش راهم يقولو عليها عندكم ,,,,,