ذكرياتي هنا ...

الاسم : أمينة
تاريخ التسجيل : 22 جويلية 2009
تاريخ اليوم : 11 فيفري 2021

مرت 11 سنة و 7 أشهر ⁦⁩

يأخذني الحنين إلى تلك الأيام فعلا لحظات لن تمحى من ذاكرتي أبدا ..
كل الشكر للصديقة الغالية والعزيزة رانيا لأنها هي من جمعتنا هنا جعلت من هذا المنتدى أجمل مقام عرفناه .. تعرفت على أناس طيبين من مختلف الجهات . استفدت كثيرا منهم ومن علمهم ، لم تكن الشاشات فقط تجمعنا بل جمعتنا المحبة والصداقة والوفاء.
كنت أفرح لفرحة أحدهم وأحزن لحزن أحدهم ، وقتها لم تكن مواقع التواصل الاجتماعي تشغل حيزا كبيرا من حياتنا .. كنت اتلهف شوقا للدخول للمنتدى بعد عودتي من الجامعة لأتفقد أحبابي ، واضع بصماتي في كل قسم من اقسامه ، كنت اعتبره بيتي الثاني لا يمر يوم وإلا وتصفحته .

بدايتي كانت مع الحبيبة نهاد ، بعد مرور كل هاته السنوات لازلت أعتبرها كأخت .. ربما الغياب كان يتكرر كثيرا لكن ما في جوفي بقي على حاله مازالت الغالية على قلبي

لن أتحدث عن رانيا أدري أن التعبير سيخونني .. لولاها ما كنت هنا ،، ممتنة لها كثيرا لأنها جعلتني أعيش هذا الشعور

يوسف الوفي/ أمير الرومانسيه ،، رسمته في مخيلتي بطريقة أعجز عن وصفها .. أمير في حضوره مبدع في كتاباته صاحب القلب الطيب والحنون، مجرد رؤية الضوء الاخضر أمام اسمه كانت كفيلة بسعادتي أتمنى أن يرزقه الله حتى يرضيه

انصاف الإنسانة البريئة والخلوقة والمخلصة لم أقابل شخصا آخر بطيبة قلبها

التوأم ( مهدي و يوسف ) أضافا نكهة خاصة للمنتدى .. كنت اعتبرهما طاقة ايجابية متنقلة بين الأقسام ،، اشتقت كثيرا لأيامهما معنا

آلاء الطيبة ، شخصيتها تركت في أثرا جميلا .. كنت أتعلم منها .. ما يميزها أنها كانت تتقن طرح مواضيعها

مختار له حضور خاص كان عضو استثنائي بأسلوبه ، حقيقة يجب علي الإعتراف بها لو كانت لدي شهادة وفاء لمنحتها له لوفائه لهذا الصرح المميز كان دائما حاضراً ، ربما أحيانا لا نتفق لكن ما عشناه معا يفوق كل شيء .

سليمة شمعة المنتدى ،، مروة نونوسة ، نينا ، والغالية espoir من المغرب أتمنى أن يسعدهن الله أينما كنَّ ... وأتمنى لو أجول بخاطرهن كما يفعلن هنٌَ.

فقدت نفسي في الكتابة و مازال الكثير من الأصدقاء والكثير من الحديث بقي داخلي .. لن اذكرهم كلهم لكن سيبقى القلب وفيا لهم

سبحان الله . أستغرب كيف مرت كل تلك السنوات الطويلة كأنها مجرد أيام 🥺 اشتقيت لأيامنا معا عائلة واحدة ،، والمنتدى في أعز نشاطه لكن هيهات فدوام الحال من المحال
مهما كانت المسافة بيننا سيبقى الحب يجمعنا

دمتم بخير اصدقائي

السلام عليكم امونة ، صراحة موضوع يضرب في الأعماق مباشرة هههه ... واش نهدر واش نخلي.... امينة انت اول وحدة تعرفت عليك في عالم المنتديات قبل هاد المنتدى و قبل منتدى تاعي تعرفنا في منتدى صقور الجزائر ادا راكي متذكرة هههه يا حصراااااه على الايام و الله معزتك عندي خاصة يعني كيما قلتي و الله ما تحسي انو سنوات هادو فاتو و مازلنا نتفكرو بعضانا لدرجة تفكرنا المنتدى و الأغرب من هادي يوسف كيفاش تفكر كلمة المرور بدون اي مساعدة من الإدارة ههههه كدلك مختار هههه و الله هدا دليل على المعزة و الحب الصافي و الاخوة اللي كانت تجمعنا مهما هدرت مغاديش نقدر نوصف سعادتي بجمعتنا هادي خصوصا انو الظروف تغيرت اللي تزوج و اللي راه باولادو و ... كل هدا و كل متاعب الحياة و رجعنا عدنا و اجتمعنا ف نفس المكان صراحة جات في بالى الآن و انا اكتب اغنية فضل شاكر و افترقنا... رجعنا لنفس الم
مكان نلتقي... أهديكم جميعا هاد الاغنية هههه
https://youtu.be/AhUNvHr3cw4

والله الأغنية معبرة رجعتيني لأيام روتانا والصيف هذا حالنا صح .. الحمد لله اللي رجعو راهم بخير والباقي نتمناو يكونو مهنيين

ومنتدى صقور هذاك أول منصة ليا فعالم المنتديات ثم ديت الخبرة هههههه غير هو اللي ماننساهش ،، فيه اللي تعرفت عليك ثمة درنا قبيلة وعرفنا يوسف .. كي قرصنوه اللي مايحشموش هزينا رواحنا وشكلنا قبيلة جديدة عندك وتلمينا من جديد .

و يوسف مفاجأة كبيرة لينا رانا مصدومين هههههههههه ان شاء الله يتفكرونا و يكملو يدخلو بالواحد

ههههههه صح و الله كان اول منتدى نشارك فيه حتى انا ، يا حصراه احلى ايام كانت صح النية اللي غابت في مواقع التواصل اللي رآها كابنة اليوم ، و الحمدلله تعرفنا على اروع ناس و الله جامي ننندم عليهم و الدليل رانا متفكرين بعضانا لحد الساعة ... و الله امنيتي يجيو البقية ... لما لا
شكرا مجددا امونة على الموضوع الجميل

والله المنتدى لو كان جا يهدر كان ,,,يعايركم قاع ,,,,,خلقتوه وربيتوه وكبرتوه ومنين والفكم هجرتوه وخليتوه علا جال ,,,,واحد جديد زرق ,,لو كان جا يبكي لكان راهم دموعه دايرين وديان ,,,,لو كان جا عنده قلب لكان راه خرجه وقطعه ,,,,لو كان جا عنده قلب لكان راه شكاكم للرب ,,,,,واش ذنبه هو ,,,صارحتوه بحزانكم بفراحكم بواش في قلبكم ,,,,بكا معاكم وضحك معاكم ورفد همومكم ,,,,,عمرتوه بالوفاء والصدق والامانة والصداقة ,,,,بصح منين تعلم واعرف واش كتبتو ,,,,,هجرتوه وخليتوه وحده ,,,,,عييت نونس فيه ,,,,عييت نسكت فيه ,,,عييت نخلق له الا سباب ,,,عييت نشرحله الظروف ,,,,بصح كل مرة يتفكر واحد فيكم ويسقسيني عليه,,,,,,,,,,كان يعايرني بواش كتبتوا ,,,,مالقيت واش نقوله ,,,,,كي شافني سكت ,,,,رضا بالامر الواقع وبدا هو تاني ينساكم ,,اذا كان غير طلوا عليه وتعاودو تهجروه غير مشقاش تفكروه بالايام الي فاتت ,,,,,,خلوه في احزانه وفي نسيانه ,,,,

🥺
علابالي حتى ونكتب دواوين حزن وممكن حتى نرثيه ما ينفعش .. غلطة صرات كيما قلت على جال واحد زرق .. بصح اللي راه في بالي ضرك علاه ما جمعناش بعضانا كامل فيه من الناس هذوك كامل معايا غير نهاد رانيا انصاف الباقي ماكان حتى واحد كيفاه سمحنا فصداقة كيما هذيك .. نعاود نقرا الردود فالمواضيع نقول خسارة كيفاه كنا ....
و آسفاه على واش صرالنا هذا ماكان أنا وحدة منهم غلطت غلطة كبيرة كي هجرت .. أول مرة نندم على حاجة كيما هاك

والله كلماتك يا يوسف تصيب القلب
أتمنى لو لا تنتهي أبدا

تحية مني لك امينة ,,,,اذا راكي حية الله يمتعك بالدنيا واذا راكي ميتة الله يرحمك .....ونضن بلي راكي ميتة على خاطر انت بروحك غير انتاع حزن من حيث عرفتك و انت منكدة قاع الهموم الدنيا طايحة عليك ,,,,,المهم الله يغفرلك ويرحمك

كنت نقرا في الموضوع بكل تأثر و نجهز كلماتي المتأثرة و فجأة يظهرلي تعليق مختار الاخير و يمحيلي كلش من راسي و الله جاتني هستيريا تاع الضحك

اهلا ومرحبا ياهلا ببنت العرب ,,,,الحمد الله لراكي حية والحمد الله على سلامتك ,,,,,راكي عارفة العقلية الناس في طريق وانا في طريق ,,,,,واش راها الامور عندك و واختك هذيك المصفارة مازلها حية كانت مرة على مرة تخرج بكلمة ولا زوج حتى هي قطعت واش نقولكم الي فيكم بكفيكم ,,,,,,,,

ههههههههه و الله مرات تقتلني لالضحك يا مختار راني حية الحمد لله و نهاد راها بخير الحمد لله مع التدريس كالمعتاد من شوية هدرت معاهم و امونة مبان عليها حتى خبر ان شاء الله تكون بخير توحشناها و معرفتش كيفاش نتواصل معاها معرفتش علاش معندناش ارقام بعض هههههه هادي قرن و حنا نعرفو بعضانا

هذاك منين راكم اشرار تتعاملوا مع بعض غير من بعيد تتلاقو غير في المنتدى وتبدو تهدرو غير العسل بصح من تبعدو بعضكم كل
وحدة تولي لطبيعتها الشريرة وتبدا تخطط للمؤامرات ووحدة مراها دايرة الثقة في الاخرى وقيلا حتى الوجوه متعرفوش بعضكم ,,,,,ياويل الي قربكم ,,,,المهم الحمد الله لراكم بخير والله يمتعكم بصحتكم و يهنيكم بهناه ,,,,,وهذيك اختك قوليلها مشي الناس سامحة في ولادها وانت قاتلة روحك عليهم ....... التعليم طريق يشترك فيه المعلمين والاباء ولا يقتصر فقط على المعلمين ..... الي باغي يقرا عاونيه والي مابغاش يتحملو والديه المسؤولية ,,,,ماعندها ماديرله ,,,,وقولي لها الطريق مازلها طويلة قدامك استحفضي على صحتك وعلى روحك مازلت عاد في البدية باش ماتكرهيش التعليم وتدخلي في دوامة الملل والديقوتاج ,,,,,تحياتي لك ولاهلك وشكرااا وممتن جدااا لتواصلك ,,,,دمتي في رعاية الله وحفضه