بسم الله على بركة الله نبدأ
اليوم نبداوها بتحلية ان شاء الله ربي يحلي أيامنا
وصفة اليوم ألذ حاجة صنعتها إيطاليا بعد البيتزا
Tiramisu en verrines
الوصفة غنية عن التعريف كامل نعرفوها وكامل جربناها .. الاختلاف فقط أنو هذي فيها لمسة عصرية خلات ذوقها خرافي نقدموها في كؤوس .. نقدرو نشكلوها ف سارسو عادي الشكل اللي تحبو .. ننصح وبشدة بها لذيذة
فيها طبقة أولى هي
السر اللي اسمها coulis chocolat .. ( هاذ كولي أنا ندير منو كمية شوية كبيرة نحتاجو في بزاف وصفات ..نقدرو نحتفظو بيه مدة اسبوع فالثلاجة داخل porte manger .. راح يجمد على خاطر فيه جيلاتين .. مع نحطوه ف micro-onde يعاود يذوب عادي .. واللي حبت تجرب غير ل تيراميسو دير نصف الكمية)
الطريقة : 250 ملل حليب + 250 ملل crème liquide Hopla نخلطوهم مع بعض ونحطوهم فوق النار تكون متوسطة ،، من جهة في إناء نخلط 6 بيضات مع 300غ سكر ناعم .
كي يسخن خليط الحليب والكريمة نضيفو شوية منو في خليط السكر والبيض نحركو مليح ، ونعاودو نرجعوه للخليط الأول ( باه ما يطيبش البيض) .. ونبقاو نحركو كي يتجانسو كل المكونات نزيدو 500غ شوكولا سوداء من الافضل الوجدان تكون مقطعة نظيفوها ونحركو باه ما تلصقش .،، فالأخير نزيدو 200غ masse de gélatine .. ( جيلاتين كي يكون مشمخ فالماء نقولولها masse ... وباه نتحصلو على 200غ : نديرو 150 ملل ماء مع 50 غ بودر جيلاتين نخلطوهم مليح ونخليوهم على جنب حتى يجمد بدون ثلاجة )
بالنسبة للجيلاتين ننصحكم ب بودر نباتي حلال . حذاري من الأوراق مصدرها حيواني مهما يقولولكم حلال نعرفو الحيوان اللي يخرجوها منو . أكرمنا الله
بعد ما نضيفو الجيلاتين فالخليط كامل .. نحركوه قيس ما يذوب برك ونطفيو النار ... نضربوه ب bras mixeur خطوة مهمة يعطيه قوام مليح ولمعان .
ونخليوه حتى يبرد شوية .
بعد ما يبرد نفرغوه في كؤوس التقديم ،، نعمرو ربع فقط مانكثروش باه ما يفقدش تيراميسو شكلو .. ونحطوه فالثلاجة ولا كونجيلاتور يجمدو
نروحو ل Crème Tiramisu : دائما اذا عدد قليل اقسمو على 2 المقادير
6 صفار بيض + 100غ سكر عادي نخفقوهم مليح ف pétrin حتى يرجع الصفار لونو أبيض تقريبا .. و نزيدو 100غ masse de gélatine اللي هي (75 ملل ماء مع 25غ جيلاتين بودر) بعد ما تجمد نذوبوها و نفرغوها على الخليط تاع الصفار والسكر ونخليوه يتخفق مليح .. بعدها نزيدو الجبن mascarpone علبة (ملاحظة في حالة ماش متوفر الجبن نعوضوه ب نصف علبة جبن وليد fondu و نصف علبة جبن أمير نخلطوهم نحصلو تقريبا على ماسكربون) ... بعد ما نزيدو الجبن نخليوه يتخفق مليح .. فالأخير نضيفو حوالي 300غ Chantilly طالعة ممكن ديرو اكثر شوية وممكن أقل ( تحبوها حلوة أو سكر أقل ) .. ال pétrin يكون فاقصى سرعة باه يتخفق مليح وتكون كريمة متجانسة وطالعة .. كي تجهز نطفيو و نحيوها (ملاحظة مهمة الكريمة فيها جيلاتين لازم ماتخدموهاش وتخليوها على جنب راح تجمد بسرعة ،، لازم مع توجد برك تتحط في كؤوس )
نكونو خرجنا الكؤوس وcoulis يكون جمد .. نجيبو les boudoirs جودة مليحة .. (فالعادة يكون تيراميسو ب Nescafé لكن هذي لالا مافيهاش قهوة )
هذا السر الثاني فالوصفة.
نخدمو سيرو اللي نشربو بيه جينواز ، (كمية سكر والماء ضعف الكمية نخليوهم يغليو فوق النار 7د ) ... سيرو لازم يكون بارد نخلطو فيه ملعقة متوسطة تويسكو ( الشوكولا بودر اللي يديروها الأطفال فالحليب) نخلطو مليح حتى تذوب شوكولا .. ونغمسو فيه بودوار تاعنا ونحطو فوق coulis مانكثروش بزاف نحطو فالنص برك .
بعدها مباشرة نحطو Crème Tiramisu في poche حلواني .. يساعد فالخدمة ونفرغو فالكؤوس نعمروهم ونخبطو مليح باه الكريمة توصل لكل الكأس.
نرجعوهم للمجمد باه تجمد الكريمة بسرعة ... بعدها التزيين .. نديرو شوكولا بودر twisco ف صفاية و نغطيو كل الكأس .. نقدرو نضيفو مكسرات حسب الرغبة
أنا درت شوكولا .. وهذيك crème caramel فيها مكسرات .
وصفة crème caramel :
250غ سكر عادي نخليوه يسخن حتى يتكرمل نضيفو 250 ملل كرام hopla .. ونحركو فالأول راح تتكعبر مع تسخن الكريمة يذوب عادي .. نبقاو نحركو مليح نزيدولهم 250غ شوكولا بيضاء (ننصح بالوجدان بنينة) .. ونطفيو ...نزيدولها مكسرات لوز و جوز يكونو محمصين (مڨليين)
وصفة تحمر الوجه فكل المناسبات ... مليحة بزاف فالسهرة ... شهية طيبة
